Investimet e diasporës janë thelbësore për zhvillimin dhe rritjen e vendeve të origjinës. Në thelbin e misionit të Germin është mobilizimi i burimeve financiare dhe njerëzore të diasporës në investime produktive në Kosovë. Ndërsa remitancat kanë kontribuar prej kohësh në zhvillimin ekonomik të vendeve të origjinës, kanalizimi i këtyre fondeve në investime strategjike është thelbësor për rritjen afatgjatë. Përmes iniciativave të synuara, Germin bashkëpunon me aktorët dhe institucionet vendore për të lehtësuar investimet e diasporës që gjenerojnë të ardhura dhe punësim në nivel lokal, promovojnë produktet vendase, forcojnë partneritetet publike-private dhe rrisin lidhjet e tregut përmes rrjeteve të diasporës.

Përpjekjet e Germin përqendrohen gjithashtu në lidhjen e ofruesve lokalë të shërbimeve me partnerë të biznesit nga diaspora për mundësi të rëndësishme ekonomike. Duke rikanalizuar remitancat në sektorë produktivë dhe duke inkurajuar investime direkte, Germin synon të rrisë pjesëmarrjen e diasporës në ekonomi dhe të kontribuojë në zhvillimin e qëndrueshëm dhe integrimin e vendeve të origjinës në ekonominë globale.

Germin ka zbatuar disa projekte për të shfrytëzuar investimet e diasporës në promovimin e zhvillimit ekonomik në Kosovë. Në këtë kuadër, Germin ka organizuar tre forume biznesi për diasporën, disa forume investimesh në disa komuna të Kosovës, ku edhe është ndërmarrë kampanja Investo në Prizren, Investo në Kamenicë dhe Investo në Vushtrri. Po ashtu Germin ka mbështetë Rrjetin e Diasporës në organizimin e panairit në Vjenë të Austrisë.

Një shembull tjeter është projekti “Veprimi Komunal për Riintegrim dhe Diasporë”, i zbatuar në bashkëpunim me Caritas Zvicra në Kosovë, i cili synonte të shfrytëzonte ekspertizën dhe burimet financiare të diasporës për të nxitur rritjen ekonomike në komunat e Kosovës.

Një tjetër iniciativë, projekti "Diaspora për Gratë Sipërmarrëse", me mbështetje nga USAID Kosovo Compete Activity, ofroi mentorim dhe trajnime për gratë sipërmarrëse në Kosovë për të përmirësuar pozicionin e tyre në tregun e eksportit. Në bashkëpunim me Parkun e Inovacionit dhe Trajnimit në Prizren (ITP), Germin ka punuar gjithashtu për të tërhequr angazhimin e diasporës në sektorin privat, në arsimin profesional, institucionet e trajnimit dhe në aktivitete kërkimore dhe inovative.

Këto projekte demonstrojnë përkushtimin e Germin për të shfrytëzuar njohuritë dhe kapitalin financiar të diasporës për të mbështetur zhvillimin e qëndrueshëm në Kosovë, duke krijuar një rrugë për integrimin e vendit në ekonominë globale.